ZDH Rudi I

Gojedaag leef luuj van de Kepel en Kemp,

Ich bön vereerd om mich veur te moge sjtelle es de nuje veurgenger van de Kaketoes veur ‘t sezoen 2020. Ich bön Rudi Silkens, 36 jaor jónk en gebaore en getaoge aan de Kepel in ’t Zandj. Nao 10 jaor gewoond te höbbe in ‘t riek van de Donderböl mit miene sjat Linda en ós twee kienjer Lieke en Tim, zeen veer sinds twee jaor weer trök aan de Kepel.


Miene pap Jan en mien mam Margriet höbbe mich altied geleerd det se hel mós werke es se get wils bereike. Väöl tied in mien laeve geit op mit werke es sales executive veur de Briggs and Stratton end products group, wo ich verantjwaordelik bön veur ‘t merk Billy Goat. Det zal nemes get zègke, mer simpel gezag: ich verkoup tuinmesjiener.

Reize doon ich gaer. Mesjien det sommige luuj zich nog herinnere det veer (Linda, Noud en Rudi) jaore geleje mit eine gaele Ford Sierra nao Dakar zeen gereje mit Team Lachmaar. Es se mer wils geit zelfs eine Sierra door de woestijn! Verder in miene vrieje tied doon ich gaer leuke dinger mit mien gezin zo es zjwumme, kampere of lekker rommele thoes mit mien twee helpertjes. Es ich d’r tied veur höb perbere veer ‘t hoes nog get te verboewe, sleutel ich gaer aan ‘t ein of anger en bön ich gaer mit de motor op paad. Verder ein pilske drinke mit vrunj is altied waal aan mich besjteed, of ‘t noe op ein festival is, bie eine bbq of in ein kroeg in de sjtad of aan Kepel. Mit good gezelsjap kump ‘t altied good.


Es Kepelse jóng bön ich väöl jaore betrókke gewaes bie versjillende vereiniginge en aktiviteite aan de Kepel. Meer es 25 jaor bön ich lid gewaes van Scouting Pater Bleijs, wo ich ein heel carrière höb gemaak van welp toet besjtuurslid. Noe nog es Vrundj van Scouting Pater Bleijs kinne ze nog altied ein beroep doon op mien hulp. In de vastelaovessfeer höb ich bie de Kaketoes in ‘t verleje gefunksjoneerd es sjoffeur in de óptoch en höb ich ellef jaor mitgeholpe bie ‘t heksverbranje op vastelaovesdinsdaag. Ich höb mich recent weer aangesjlaote om ‘t verbranje mit te helpe organizere. Sorrie, mer dit jaor op dinsdaag höb ich ein redelik vol program sjtaon, dus helpe waerd lestig. Mer branje zal se ouch dit jaor!

Gek genóg sjloog ich mich vreuger mit al mien adjudante regelmaotig de kop in. Mer dit haet vermoedelik de bandj allein mer versjterk. Twee adjudante kin ich al heel mien laeve, want det zeen namelik mien breurs Erwin en Marcel. Sjra dae kin ich al zeker 30 jaor en bie scouting waas d’r regelmaotig partner in crime es veer veur angere onmeugelik liekende programma’s aan ‘t oetveure ware.


Ich bön neet bang veur ein bietje oetdaging. Of ‘t noe geit om ‘t make van ein nuuj daak, ein reisje nao Afrika mit de auto of dinger op mien werk. Vandao det ich de scepter zjweij ónger ‘t motto: ‘Alles geit, es se mer wils!’

Veer zeen ós!
Prins Rudi I

Foto: Hans Sweegers, Heel

Extra: Loester hie de sjlager (MP3, gezipt).

Extra: Bekiek hie de teks van de sjlager.

ZDH Rudi I
ZDH Rudi I
ZDH Rudi I