Jeugprins Luc I

Hallo allemaol,

Miene naam is Luc Stams. Ich bön gebaore in ‘t ziekehoes van Remunj op 4 meert 2008 en woon aan de Kepel oppe Heinsbergerwaeg.

Dao woon ich same mit pap, mam en oze hondj Fixen. Pap Harrie verdeent zien bótterham mit de sjtoumerie en mam Vivian wirk es assistent-manager in de sjpeelgoodwinkel op ‘t Retailpark. Eder jaor gaon veer mit de caravan nao de camping van Max in Oosteriek. Det is ós tweede thoes.

Ich zit in unit 4 van de Synergiesjool. Mien levelingsvakke zeen, gym, laeze, taal, topografie en handjvaardigheid. Raekene vinj ich minder leuk. De scouting leek mich waal get, maar ich mós van pap en mam eers mien A-diploma zjwumme haole. Inmiddels höb ich al jaore C en bön ich doorgegreujd nao de scouts.

Same mit mam doon ich bugel sjpele, ich bie de jeugfamfaar van de Kepel en mam bie ‘t Ketoene Dörp. Hie moog ich mit de repetities mit oefene, Dan zit ich tösse mam en mien tante in. Verder bön ich regelmaotig in de Kepel te vinje, dao doon ich es misdeenaar de mis dene.

Wie ich gevraog waerde en mer ins mós dinke waem ich es adjudante zól wille, hoofde ich neet lang nao te dinke. Metein kwame Levi, Lars en Nora teveursjien. Ich zou ‘t heel tof vinje es ze mit mich mit zólle wille doon. Wie ich ze ging vraoge, zeide ze metein alle drie jao!

En toen begós ‘t zjwiege, planne make, kleijer oetzeuke en passe, leedje bedinke en veural taege nemes get zègke. De papa’s en mama’s höbbe döks vergaderd en veer ós ongertösse good geammezeerd.

Noe is ‘t dan zo wied, eindelik hove veer neet meer te zjwiege en moog ederein ‘t weite. Veer, jeugprins Luc I en de adjudante Levi, Lars en Nora winse uch allemaol eine hele sjone vastelaovend!

Jeugprins Luc I

Foto: Hans Sweegers, Heel

Extra: Loester hie de sjlager (MP3).

Extra: Bekiek hie de teks van de sjlager.

Jeugprins Luc I
Jeugprins Luc I
Jeugprins Luc I
Jeugprins Luc I